Maktubu dɨ ka dwar̰ɨ
Jak da, gɨ way ba i geche gɨnə nare nənə Kris duwa dwar̰agɨ lə mana gɨ Jursalem, yarna Galat 2.9, an̰ji ba i Jesu chendɨw. An̰ji jangɨgɨ nare nənə Kris duwa nə sɨn̰a dɨdə ka pad maktubu dara gɨləgɨ i man me, mani day nə àla ba ha gɨlə dara cendi ba i woni kala dusɨrəgɨ Mãr̰ĩ dɨwwə di mo?
An̰ji gɨsɨ nare nan̰ye: An̰ji waygɨ nare woni ꞌywaa mani ba àlna kwandagɨ nə bugɨr ichɨn̰ bədə. An̰ji waygɨ nare nənə Kris duwa, wamani ba ꞌywanagɨ kaw, cendi ba yɨnə sɨdəgɨ wayna le bɨrmə gɨnə Mãr̰ĩyə (Jak 1).
Gun gɨ ba wayna baa kal dusɨw i Mãr̰ĩ dɨwwə da, kal mani duwa nə àla ba bwarna gɨ gwale duwa gɨ an̰ji wayɨw di. Pəgɨn̰ bədə da, dusi duwa dɨ kala di ba i mani nə pəgɨn̰ (Jak 2).
Kal gun ba gamna bɨw gaba waya gwale di le. Ɗang da, Jak way dara dɨrɨn̰ naa nə swaa Mãr̰ĩ sɨwwə me (Jak 3).
An̰ji way dara nare nənə Kris duwa da, ba kalna nasɨba ɗi, me cendi ba ina i nare woni ꞌwaga sɨdəgɨ bədə me ca (Jak 4).
ꞌYan̰a lə da, an̰ji way dara nare nənə Kris duwa ba yɨnə sɨdəgɨ wayna dara ɓyada gɨ aba ciri gɨ Jesu cwara duwa. Me wamani na na ba ꞌywanagɨ kaw, cendi ba amsɨna Mãr̰ĩ (Jak 5).
