Les illustrations sur ce site sont de Jim Padgett, © 1984 Sweet Publishing, Ft Worth TX, and Gospel Light, Ventura CA.
Maktubu dɨ ka dwar̰ɨ
Matiyə i woni gɨrsə gwale gɨnə Jesu duwa gun day gɨ mɨn (9.9; 10.3). Dúndi dɨnə Mãr̰ĩ duwa nogɨ gɨndɨw ba jangɨna maana dɨnə Jesu duwa mana gɨ maktubu lə. An̰ji jangɨ i dara kwandaw nare nə Juwib dara gɨləgɨ ba Dole gɨ Mãr̰ĩ biyəw gɨ Kris gɨ woni cɨmə Mãr̰ĩ bɨw jangɨ gwale duwa pii di ba i Jesu ꞌyang. Me Jesu di hára i dara nare nə Juwib mɨra bədə. Matiyə gɨlɨndɨ dara Jesu ba kɨjɨ woni gɨrsə gwale duwa ba hana waynagɨ nare nə gɨndəgɨ jiga jiga pad Nõ dɨ lade mana gɨ sɨn̰a gɨndɨdɨ lə pad (28.19-20).
Diyə gɨ maktubu dɨnə Matiyə duwa gɨndɨdɨ lə da, an̰ji way ba Jesu di gɨ yə̀w i man mo, gɨ àlɨw batem man me, Sidan kan̰jɨ bɨrmə gɨrsɨw man me, mo (ch. 1-4). Ɨr̰ɨ, an̰ji way dara mani nə Jesu àlgɨ me gɨlə duwa gɨ mani me (ch. 4-25).
Jesu way gwale nan̰ dara dwãr̰ĩ dɨnə Mãr̰ĩ duwa. Matiyə ꞌwogɨdɨ ba i «dwãr̰ĩ dɨ daa». «Dwãr̰ĩ dɨ daa» labaa, «dwãr̰ĩ dɨnə Mãr̰ĩ duwa» da, i jiga jiga bədə. Matiyə day gɨlə gɨnə Jesu duwa di daa mana lə jii: Jesu way da, nare nə gandɨ ha ciri dɨ Mãr̰ĩ lam dwãr̰ĩ duwa lə da, ba ha dama i man mo (ch. 5-7).
Jesu kɨjɨ paja duwa me, gɨsɨgɨ cendi ba ha àla i man me, ba ha waya dwãr̰ĩ dɨnə Mãr̰ĩ duwa gwale dɨra mo (ch. 10). An̰ji way gwale gɨ diri dara gɨləgɨ gɨ nare ba i man me, Mãr̰ĩ ba lam gɨ dwãr̰ĩ duwa mo (ch. 13). Jesu way gwale dara kala gɨ dusi hɨlala gun dɨwwə (ch. 18), me an̰ji gɨlɨndɨ dara ba də damnang gɨ dɨrəndɨ bɨ̀ra ɓyadɨnaw nɨm ba ha cwara hára lə dara agɨ nare sariya me Mãr̰ĩ ba ha lama dwãr̰ĩ duwa daa pɨden̰yə me ca (ch. 24-25).
Maktubu dɨnə Matiyə yan̰a dɨra lə da, an̰ji way gwale gɨnə Jesu day gɨ nə gechide nənə nare nə Juwib day, ba gɨ ɨlɨwwe me, ba gɨ kal nare nə Rom ɓengɨw ɓabɨr̰ɨw daa habda gɨ dagɨla sɨwwə me, an̰ji ba mar me, an̰ji ba dɨm daa munɨ lə me (ch. 26-28).
